ერთი დღე - ერთი პრობლემა

სასწავლო ფორმატი წარმოადგენს პრობლემაზე და კვლევებზე დაფუძნებულ სასწავლო პრაქტიკას, რომლის ფარგლებში მოსწავლეები მთელი სასწავლო დღის განმავლობაში მუშაობენ ერთი საკითხის /თემატიკის ირგვლივ, დღის ბოლოს კი ქმნიან პროდუქტს, ჭრიან პრობლემას ან აკეთებენ შესწავლილი საკითხის პრეზენტაციას.

ფორმატის დანერგვის მიზნები

კომპლექსური პრობლემების გადაჭრის გზით მოსწავლეებში ბუნებისა და მეცნიერების მიმართ ინტერესის გაღვივება;
სიღრმისეული საბაზისო სამეცნიერო ცოდნის მიღება და მისი კონცეპტუალური ანალიზი;
მეცნიერული ჰიპოთეზის ჩამოყალიბების და სამეცნიერო კვლევის დაგეგმვისთვის საჭირო ცოდნისა და უნარების შეძენა;
სამეცნიერო კვლევის ჩატარების და მიღებული შედეგების ინტერპრეტაციის უნარების განვითარება და მისი გამოყენება ყოველდღიური პრობლემების გადასაჭრელად;
მეცნიერული ცოდნის შესაქმნელად ხანგრძლივი, რუტინული სამუშაოების წარმოების უნარის განვითარება;
გუნდური მუშაობისა და შემოქმედებითი უნარების განვითარება;

ზოგადი ფორმატი

დღის დასაწყისში მასწავლებელი მოსწავლეებს წარუდგენს გადასაჭრელ პრობლემას ან შესასწავლ საკითხს. საჭიროებისამებრ, მიაწვდის მათ რესურსებს.
მოსწავლეები ნაწილდებიან ჯგუფებში და თავად იწყებენ ინფორმაციის მოძიება-შესწავლას, გეგმის დასახვას, პრობლემის გადაჭრის გზების მოძიებას, რასაც შუალედური ანგარიშის სახით წარუდგენენ კლასს.
დისკუსიისა და კონსულტაციების შემდეგ, გუნდები თანხმდებიან კვლევის მეთოდზე ან/და პრობლემის გადაჭრის გზაზე და იწყებენ მუშაობას, რაც ძირითადად მოიცავს ლაბორატორიულ ან საველე აქტივობებს.
ახორციელებენ დაკვირვებებს, აგროვებენ მონაცემებს, აკეთებენ ანალიზსა და შესაბამის დასკვნებს, ქმნიან პროდუქტებს.
დღის ბოლოს გუნდები ერთმანეთს წარუდგენენ საკუთარ ნამუშევარს, მსჯელობენ, გასცემენ და იღებენ უკუკავშირს.