ტრადიციულ სასკოლო სისტემების მიზნები ძირითადად გულისხმობს გამოცდებისთვის, მომავლისთვის მზადებას. ჩვენ კი გვინდოდა, რომ აწყმოშივე გაეკეთებინათ მოსწავლეებს ღირებული საქმიანობები. ამ გზით, მოსწავლის დაინტერესება კიდევ უფრო მარტივდება, რადგან ის უფრო ნათლად ხედავს თუ რატომ უნდა ჩადოს ძალისხმევა სწავლაში. ამასთან, მათი განვითარების ეტაპი და შესაძლებლობები იძლევა საშუალებას, შევხედოთ მათ, როგორც ზრდასრულებს და დავუსახოთ ისეთი გამოწვევები, რასაც ძირითადად სკოლის დასრულების და უნივერსიტეტში ყოფნისას აწყდებიან.

პროგრამაში გამოიყენება სტანდარდატზე დაფუძნებული შეფასების სისტემა.

პირველი ალტერნატიული პროგრამის მოსწავლეებმა, შექმნეს საგანმანათლებლო ორგანიზაცია დერეფანი რომელმაც, მაგალითად, დაგეგმა და გააკეთა ბანაკი ცემში (რომელშიც სანდროც იყო). ახლა ამზადებენ კიდევ ერთ ბანაკს. ბანაკის შინაარსობრივ ნაწილზე, დაგეგმვაზე და მარკეტინგზე თავად იმუშავეს და მიღებულ ფინანსურ მოგებას გამოიყენებენ თავიანთი ორგანიზაციის განვითარებისთვის. მეორე ალტერნატიული პროგრამის მოსწავლეებმა, შექმნეს კვლევითი ინსტიტუტი ინსაითი, რომლის ფარგლებშიც გარდა სხვა კვლევების დამუშავებისა, ჩაატარეს ინდივიდუალური კვლევები და წარადგინეს ისინი.ამას გარდა, კვლევითი ინსტიტუტის მოსწავლეების ერთწლიან სწავლის შედეგებზე შესაძლებელია ორი მიმართულებით ვისაუბროთ: აკადემიური და მაღალი სააზროვნო უნარების განვითარება და პიროვნული უნარ-ჩვევების განვითარება. ისეთი ახალი დისციპლინების შესწავლით, როგორებიცაა სამართალი და მარკეტინგი, მოსწავლეებმა შეძლეს კვლევითი ინსტიტუტის ჩამოყალიბება და სოციალური პლატფორმის მართვა. კვლევის მეთოდების შესწავლის პარალელურად მოსწავლეები ატარებდნენ ჯგუფურ და ინდივიდუალურ კვლევებს. შედეგად, მათ დაამუშავეს ლიტერატურა, შეაგროვეს და გაანალიზეს მონაცემები და წარმოადგინეს კვლევების სრული ანგარიში. რაც შეეხება პიროვნულ უნარ-ჩვევებს, განივითარეს დაგეგმვის, ორგანიზების, რეფლექსიისა და კოლაბორაციის უნარები.

სტანდარტული სასკოლო საგნების სწავლება შენარჩუნებულია ალტერნატიულ პროგრამაში. საგნობრივი სამიზნე კომპეტენციები შესაბამისობაშია ეროვნულ სასწავლო გეგმასთან. მოსწავლეების ინტერესების, საჭიროებებისა და კვლევითი ინსტიტუტის პროგრამის მიზნიდან გამომდინარე ხდება გარკვეული საგნობრივი თემების უფრო გაღრმავებულად და ურთიერთდაკავშირებულად შესწავლა. ამასთან, ტრადიციული სისტემისგან განსხვავებით, ამ პროგრამაში მოსწავლეთა რაოდენობა ბევრად ნაკლებია, პირველ წელს იყო 6, მეორე 5, შესაბამისად ისინი მასწავლებლებისგან უფრო მეტ ყურადღებას იღებენ და ამ გზით, უფრო მეტად ვითარდება მათი საგნობრივი კომპეტენციები.